Gå til hovedinnhold

Om rettleiaren

Formålet med rettleiaren er at det skal bli enklare for frivillige organisasjonar å søke om og rapportere på statlege tilskot, slik at ressursar kan bli frigjorde til aktivitet. 
  • Slik skal vi sikre gode rammevilkår for frivillige organisasjonar 
  • Har du innspel til rettleiaren?

Sist oppdatert

Målgruppa for rettleiaren er både statlege tilskotsforvaltarar (departement og underliggande verksemder) og vidarefordelarar av statlege tilskot. Desse omtalar vi frå no av som forvaltarar.  
Rettleiaren kan vere til hjelp når forvaltarar skal utarbeide eller revidere regelverk for tilskotsordningar. Forvaltarane bør vurdere om eksisterande ordningar kan forenklast, eller om omgrep kan harmoniserast, i tråd med denne rettleiaren.  Det er departementa som har ansvar for å fastsette regelverk for tilskotsordningane.
Rettleiaren består av to delar: 
  • I første del går vi gjennom sentrale omgrep frå tilskotsordningar for frivillige organisasjonar. Her finn du definisjonar av omgrep og beskriving av dokumentasjonskrav. Nokre definisjonar er vidareførte frå førre utgåve av rettleiaren, og nokre er nye. Andre definisjonar er reviderte, i tråd med bruk av same omgrep i relevante forskrifter som gjeld tilskotsordningar for frivillige organisasjonar. 
  • I andre del gir vi råd om forenkling, særleg når det gjeld type tilskot, gjenbruk av data, revisjon og revisorrapport, og dessutan overføring av midlar. 
Reglane om utforming og forvaltning av statlege tilskot finn du i økonomiregelverket. Vi anbefaler at du startar med rettleiinga frå Direktoratet for forvaltning og økonomistyring (DFØ). Bruk denne rettleiaren - Forenkling av statlege tilskotsordningar for frivillige organisasjonar som eit supplement.

Slik skal vi sikre gode rammevilkår for frivillige organisasjonar 

Starte og drive ein frivillig organisasjon er ei av sju livshendingar i regjeringa sin digitaliseringsstrategi. Målet er å forenkle og samordne digitale tenester og å bidra til å realisere prinsippet om «berre éin gong». Dette inneber at frivillige organisasjonar berre rapporterer informasjon til det offentlege éin gong, slik at dei skal få meir tid til å drive aktivitet.
Tilskudd.no gir ei samla oversikt over statlege tilskotsordningar til ideelle og frivillige organisasjonar. Dette skal hjelpe organisasjonane til å bruke mindre tid på å leite etter ordningar og få meir tid til aktivitet.
Det er sett i gang fleire prosessar for å sikre gode rammevilkår for frivillige organisasjonar og forenkle kontakten frivillige organisasjonar har med det offentlege. Prosessane skal bidra til realisering av livshendinga. Nedanfor ser du nokre eksempel. Vi vil oppdatere rettleiaren i tråd med relevante endringar i desse prosessane. 
  • Formålet med prosjektet «Digitalt økosystem for deling av data om frivillige virksomheter» er å vidareutvikle Frivilligregisteret, slik at registeret får fleire relevante og kvalitetssikra data om frivillige organisasjonar. Det er viktig at opplysningane er lett tilgjengelege og kan gjenbrukast. Prosjektet er leia av Brønnøysundregistera. Oslo kommune og Lotteri- og stiftelsestilsynet deltar.  
Både revideringa av frivilligregisterlova og prosjektet Digitalt økosystem for deling av data om frivillige virksomheter  følger opp nokre av anbefalingane i rapporten Videreutvikling av Frivillighetsregisteret.

Har du innspel til rettleiaren?

Dette er tredje utgåve av rettleiaren, og han er no for første gong i nettversjon.
Vi tar gjerne imot innspel frå både forvaltarar og frivillige organisasjonar. Send eventuelle innspel til tilskot@lottstift.no. 


Fant du det du lette etter?